महाराष्ट्र मान्सूनपूर्व तयारी आढावा बैठक २०२६

महसूल व वन विभाग
आपत्ती व्यवस्थापन, मदत व पुनर्वसन

आगामी मान्सून हंगामाच्या पार्श्वभूमीवर महाराष्ट्रातील मान्सूनपूर्व तयारीचा आढावा घेण्यासाठी मा. मुख्यमंत्री यांच्या अध्यक्षतेखाली दिनांक २२ मे २०२६ रोजी सह्याद्री राज्य अतिथीगृह, मलबार हिल, मुंबई येथे उच्चस्तरीय आढावा बैठक आयोजित करण्यात आली.

मान्सून हंगामापूर्वी राज्यातील प्रमुख विभाग, जिल्हा प्रशासन, महानगरपालिका, केंद्रीय संस्था, पायाभूत सुविधा यंत्रणा आणि आपत्कालीन प्रतिसाद दलांची तयारी तपासणे, तसेच संपूर्ण राज्यात समन्वित नियोजन, प्रभावी प्रतिसाद यंत्रणा आणि सज्जता सुनिश्चित करणे, हा या बैठकीचा उद्देश होता.

या बैठकीत भारतीय हवामान विभागामार्फत २०२६ च्या मान्सून अंदाजाचे सादरीकरण करण्यात आले. तसेच भारतीय लष्कर, भारतीय नौदल, भारतीय वायुदल, भारतीय तटरक्षक दल, राष्ट्रीय आपत्ती प्रतिसाद दल, राज्य आपत्ती प्रतिसाद दल, दूरसंचार विभाग, मध्य रेल्वे, पश्चिम रेल्वे, कोकण रेल्वे, जवाहरलाल नेहरू पोर्ट ट्रस्ट, मुंबई पोर्ट ट्रस्ट, बृहन्मुंबई महानगरपालिका, इतर महानगरपालिका, मुंबई महानगर प्रदेश विकास प्राधिकरण आणि सर्व विभागीय आयुक्त यांनी मान्सूनपूर्व तयारीबाबत माहिती सादर केली.

या आढावा बैठकीत जिल्हास्तरीय पूर्वतयारी, आपत्कालीन प्रतिसाद व्यवस्था, आंतरविभागीय समन्वय, दळणवळण यंत्रणा, पूरप्रवण व दरडप्रवण क्षेत्रांची तयारी, शहरी पूरस्थितीविषयक तयारी, वाहतूक व रेल्वे व्यवस्था, बंदरे व किनारी भागातील सुरक्षा, आरोग्य यंत्रणेची तयारी आणि अतिवृष्टीच्या काळात अत्यावश्यक सेवा सुरळीत ठेवण्याबाबत सविस्तर आढावा घेण्यात आला.

महसूल, गृह, सार्वजनिक बांधकाम, परिवहन व बंदरे, ऊर्जा, नगरविकास, पर्यटन, अन्न व नागरी पुरवठा, जलसंपदा, ग्रामविकास, पाणीपुरवठा व स्वच्छता, मृद व जलसंधारण, सार्वजनिक आरोग्य, पर्यावरण, कृषी, पोलीस, अग्निशमन सेवा आणि इतर संबंधित विभागांचे वरिष्ठ अधिकारी या बैठकीत सहभागी झाले होते.

मा. मुख्यमंत्री यांनी सर्व विभागांनी आणि जिल्हा प्रशासनांनी मान्सून हंगामासाठी पूर्णपणे सज्ज राहावे, तसेच राज्य, जिल्हा आणि स्थानिक स्तरावरील प्रतिसाद यंत्रणांमध्ये प्रभावी समन्वय राखावा, असे निर्देश दिले. मान्सूनपूर्व तयारीशी संबंधित सर्व प्रलंबित कामे पुढील १५ दिवसांत पूर्ण करण्याचे निर्देशही त्यांनी दिले.

बैठकीत सर्व संबंधित यंत्रणा आणि भागधारकांच्या सेवांचे राज्यव्यापी एकत्रीकरण करण्यावर भर देण्यात आला. आपत्कालीन परिस्थितीत समन्वय, प्रतिसादाचा वेग आणि नागरिकांना दिली जाणारी सेवा अधिक प्रभावी करण्यासाठी कृत्रिम बुद्धिमत्ता आधारित मॉडेल्स, तसेच कॉल स्वीकारणे आणि त्यांचे तातडीने प्रेषण/वितरण करण्यासाठी AI-सक्षम सहाय्यक प्रणालींचा वापर करण्याबाबतही चर्चा करण्यात आली.

या बैठकीस मा. आपत्ती व्यवस्थापन, मदत व पुनर्वसन मंत्री, मा. उपमुख्यमंत्री, संबंधित विभागांचे वरिष्ठ अधिकारी, केंद्रीय संस्थांचे प्रतिनिधी आणि आपत्कालीन प्रतिसाद यंत्रणांचे वरिष्ठ अधिकारी उपस्थित होते.

आपत्ती व्यवस्थापन, मदत व पुनर्वसन विभागामार्फत आगामी मान्सून हंगामासाठी राज्यभरात पूर्वतयारी, समन्वय आणि प्रतिसाद व्यवस्था अधिक सक्षम करण्यासाठी आवश्यक उपाययोजना करण्यात येत आहेत.